'పుట్టిన ఊరికి ఖ్యాతి రావాలిగా మరి' అంటారు చిరునవ్వుతో....
చిత్రపరిశ్రమ హైద్రాబాద్‌లో ఉంటే మీరు వైజాగ్‌లో ఉండడానికి కారణం?
నా జన్మస్థలం విశాఖపట్నం. అందుకే ఇక్కడ ఉంటున్నాను. వచ్చే కీర్తి విశాఖపట్నానికే దక్కాలిగా. అందుకని.
మధుసూదన రావుగారితోపాటు చాలామంది యాక్టింగ్‌స్కూల్స్‌ని నడుపుతున్నారు కదా? మీ ప్రత్యేకత ఏమైనా ఉందా?
చాలా యాక్టింగ్‌ స్కూల్స్‌ ఉంటే ఉండవచ్చు. మా కంటూ ఓ మార్క్‌ ఉంది కదా. మా విద్యార్థుల్లో అధిక శాతం మంది అంటే 57మందికి పైగా వెండితెరకు పరిచయమయ్యారు. అనేక మంది గుర్తింపు పొందారు. ప్రస్తుతం స్టార్‌డమ్‌ ఉన్న వాళ్లల్లో చాలా మంది మా విద్యార్థులే.
ఈరంగంలోకి మీరు రావడానికి కారణం? అసలు హీరో కావాలనుకునేవారికి వుండాల్సిన లక్షణాలేంటి?
చిరంజీవిగారితో నాకు 'మంచుపల్లకి' సినిమా నేపథ్యంలో పరిచయం ఏర్పడింది. అసిస్టెంట్‌ డైరెక్టర్‌గా పనిచేస్తున్న నాలో ఆయన ఏ ఏ లక్షణాల్ని గమనించారో గానీ, ట్రైనింగ్‌ కోసం పవన్‌ కళ్యాణ్‌ని నా దగ్గరకు పంపించారు. అలా
ప్రారంభమైంది నా ఇనిస్టిట్యూట్‌ ప్రస్థానం. హీరో అవ్వాలనుకునే వాళ్లకి ముందు ఆసక్తి ఉండాలి. జ్ఞాపకశక్తి, అర్ధం చేసుకోగల సామర్థ్యం ఉండాలి. ఇక అందరికీ తెలిసినట్లు శారీరక దారుఢ్యం కూడా చాలా అవసరం.
మీ షెడ్యూల్‌ ఎన్నింటి నుంచి ఎన్నింటి వరకు కొనసాగుతుంది?
తెల్లవారుజామున 5 గంటలకే నిద్రలేస్తాను. యోగా, జిమ్‌ వంటివి చేస్తుంటాను. ఫిజిక్‌ గురించి విద్యార్థులకు చెప్పేముందు నేను ఫాలో అవ్వాలి కద అందుకే ఇదంతా. ఉదయం 10 నుండి మధ్యాహ్నం 1గంట దాకా, మధ్యాహ్నం 2గంటల నుండి సాయంత్రం 5 గంటల దాకా తరగతులు వుంటాయి. ఇప్పటి వరకు నేను సిబ్బందిని పెట్టుకోలేదు. అన్ని పనుల్నీ నేనే దగ్గరుండి చక్కబెట్టుకుంటాను. ది సత్యానంద్‌ యాక్టింగ్‌ ఇనిస్టిట్యూట్‌లో శిక్షణకు సంబంధించిన అన్ని ఉపకరణాలూ అందుబాటులోనే ఉంటాయి.
మీకు హీరో ఫీచర్లు ఉన్నాయి? మరి మీరెందుకు సినిమాలకు ప్రయత్నించలేదు?
ఇటీవలే గోపీచంద్‌ సినిమాకి సంబంధించి, ఏలేటి చంద్రశేఖర్‌ నన్ను సంప్రదించారు. హీరోయిన్‌ తండ్రి పాత్ర ఉందని ఫొటోలు తీసుకున్నారు. అయితే తండ్రి పాత్రకు సెట్‌ కారు. మీరు హ్యాండ్సమ్‌గా ఉన్నారని చెప్పారు.
ఎంతో మంది యువ హీరోల్ని తయారు చేస్తున్నారు కదా? మరి మీ సంస్థకు సంబంధించి ఎందుకు పబ్లిసిటీ ఇవ్వడం లేదు?
ఇప్పటి వరకు పబ్లిసిటీ చేయాల్సిన అవసరం రాలేదు. ఇండిస్టీలో అందరికీ నేను తెలుసు. నటనకు సంబంధించి శిక్షణ తీసుకునేందుకు వారంతట వారే నన్ను కాంటాక్ట్‌ అవుతారు. బోర్డు పెట్టి హంగామా చేయడం నాకు నచ్చదు. అలాగని సెలబ్రిటీల పిల్లలకే శిక్షణనిస్తానని కాదు. నా దగ్గరకు వచ్చిన వాళ్లకు శిక్షణనిస్తాను. ఇంకాచెప్పాలంటే నాదంతా మౌత్‌ పబ్లిసిటీనే. అందుకే ఇప్పటి వరకు ప్రచారం చేసుకోవాల్సిన అవసరం రాలేదు.
మీ అభిమాన శిష్యుడు ఎవరు? ట్రైనింగ్‌ సమయంలో పవన్‌కళ్యాణ్‌, మహేష్‌బాబు, ప్రభాస్‌, హవీష్‌ల్లో ఏఏ అంశాల్ని గుర్తించారు?
అందరూ.. నాకిష్టమైనవాళ్లే. ప్రతి ఒక్కరికీ ఏదో ఒక సమస్య ఉంటుంది. దాన్ని గుర్తించగలిగితే సమస్యకు పరిష్కారం దక్కినట్లే.
పవన్‌ కళ్యాణ్‌ విషయానికి వస్తే అతనికి సిగ్గు, బిడియం ఎక్కువ. మొదట్లో కెమెరా ముందు నటించేందుకు అందరూ ఇబ్బందిగా ఫీలవుతారు. అయితే పవన్‌ కళ్యాణ్‌ ఆ సమస్య నుండి ట్రైనింగ్‌ సమయంలోనే బైటపడ్డాడు.
మహేష్‌బాబు విషయానికి వస్తే మొదట్లో అతనికి తెలుగు సరిగ్గా రాదు. తెలుగు చదివేందుకు చాలా ఇబ్బంది పడ్డాడు. బట్‌ ఇప్పుడా ప్రాబ్లం లేదు. జల్సా మూవీలో బ్యాక్‌ గ్రౌండ్‌ వాయిస్‌ ఇవ్వడమే కాదు. లేటెస్ట్‌గా బిజినెస్‌మెన్‌లో పాట పాడేందుకు సిద్ధమయ్యాడు.
ఇక ప్రభాస్‌కి స్వతహాగా లేడీస్‌ అంటే భయం. అతని బ్యాచ్‌లో అమ్మాయిలు లేకపోవడంతో భయం అలాగే కొనసాగింది. అయితే నెమ్మదిగా ఆ భయాన్ని వదిలించాను. ట్రైనింగ్‌కి వచ్చేటప్పుడు ప్రభాస్‌ సన్నగా ఉన్నాడు. ఆ తర్వాత మీరే చూస్తున్నారుగా...
హవీష్‌ విషయానికి వస్తే అతను తెలివైన వాడు. ఒక్కసారి చెబితే ఎలాంటి విషయాన్నైనా అర్ధం చేసుకోగలడు.
మీ దగ్గర శిక్షణ తీసుకొనేవారికి మీ పరిచయాలతో ప్లేస్‌మెంట్స్‌ని ఏర్పాటు చేస్తారా?
ప్లేస్‌మెంట్స్‌ విషయంలో నేను మొదట్లో గ్యారంటీ ఇవ్వను. అయితే నన్ను దర్శకులు సంపద్రించినప్పుడు, ఫలానా మూవీకి ఆడిషన్లు జరుగుతున్నాయి. వెళ్లమని అందరికీ సూచిస్తాను. సెలక్ట్‌ చేసుకోవడం డైరెక్టర్లు, ప్రొడ్యూసర్ల వంతు.
మీరు ఫలానా పాత్రకి సూటవుతారు. ఈ తరహా పాత్ర బాగా పోషించగలరని హీరోలకు చెప్పడం... వారి లోపాల్ని సరిదిద్దడం వంటివి చేస్తారా?
ఫలానా వ్యక్తికి ఫలానా రోల్‌ ఇవ్వాలా వద్దా అన్నది ఆయా డైరెక్టర్లపై, వచ్చిన అవకాశాలపై ఆధారపడి ఉంటుంది. దాని కనుగుణంగానే వారికి అవకాశాలు వస్తాయి. నా మటుకు నేను నా దగ్గర ట్రైనింగ్‌ తీసుకెళ్లిన ప్రతి విద్యార్థిలో లోపాల్ని గమనిస్తే ఫోన్‌ చేసి చెబుతుంటాను. ఇప్పటికీ అదే పద్ధతి కొనసాగుతోంది.
మాస్‌, క్లాస్‌ సినిమాల్లో నటించేవాళ్లకి పౌరాణిక సినిమాల్లో ఎలాంటి అనుభవాలు ఎదురవుతాయి?
మాస్‌, క్లాస్‌ సినిమాలన్నది వారు ఇండిస్టీలో తెచ్చుకున్న ఫేమ్‌ని బట్టి ఉంటుంది. ఈ తరహా సినిమాలకు భాషపై పట్టు అవసరంలేదు. మామూలుగా వస్తే చాలు. అదే పౌరాణిక సినిమాలో పాత్రకి భాషమీద పట్టు చాలా అవసరం.
నేటికీ అదే జోరు...
బాల నటునిగా 67లో రంగప్రవేశం చేసిన సత్యానంద్‌లో నేటికీ అదే ఊపు. అదే జోరు. అఖిల భారత నాటక కళాపరిషత్‌ పోటీల్లో 40సార్లుకుపైగా ఉత్తమ బాలనటునిగా ఎంపికైన ఆయన చిన్నతనంలోనే పలు అవార్డుల్ని కైవసం చేసుకున్నారు. అంతేకాదు రాష్ట్ర అఖిత భారతస్థాయిలో 25సార్లు ఉత్తమ నటుడి అవార్డుల్ని పొందిన ఆయన 1975 నుంచి విశాఖపట్నంలోని థియోటర్‌ గ్రూప్‌ కళా జ్యోత్స్న స్టేజ్‌ డైరెక్టర్‌గా పనిచేశారు. ఈ హోదాలో 15నాటకాల్లో, 60 నాటికల్లో నటించి 90సార్లకుపైగా ఉత్తమ నటుని అవార్డుని పొందారు. ప్రజాదరణలో ఉన్న సౌండ్‌ అండ్‌ లైట్‌ ప్రోగ్రామును రూపొందించడంతోపాటు, భారతరత్న ఇందిరమ్మకు దర్శకత్వం వహించారు. బెంగుళూరుకు చెందిన సాంగ్‌ అండ్‌ డ్రామా డివిజన్‌, ఆంధ్రప్రదేశ్‌ నేషనల్‌ ఇనిస్టిట్యూట్‌ ఆఫ్‌ సోషల్‌ యాక్షన్‌లను సంయుక్తంగా నిర్వహించి 1987లో 42రోజులపాటు ఈ కార్యక్రమాన్ని నిర్వహించారు. నాటి ప్రధాని రాజీవ్‌ గాంధీ ఈ కార్యక్రమాన్ని తిలకించి సత్యానంద్‌ను ప్రసంశించారు. దీంతోపాటు నాటికలు గంగిరెద్దాట, బొమ్మలాట, రైలుబండిలు కూడా ఆయనకు మంచి గుర్తింపు తెచ్చాయి. పలు రాష్ట్రాల్లో వీటిని ప్రదర్శించిన సత్యానంద్‌ విమర్శకుల నుంచి ప్రశంసల్ని అందుకున్నారు. అందుకు నిదర్శనం 1998లో సౌత్‌ జోన్‌ థియేటర్‌ ఫెస్టివల్‌తోపాటు, జాతీయస్థాయి పోటీల్లో బొమ్మలాట నాటకాన్ని ప్రదర్శించడమే. నెహ్రూ శతాబ్ది నాట్య సామ్రాట్‌తోపాటు, అవుట్‌ స్టాండింగ్‌ యంగ్‌ పర్సన్‌గా అవార్డుల్ని పొందారు. 'బొమ్మలాట' సాంఘిక నాటకానికి 1995లో విశిష్ట పురస్కారాన్ని పొందిన ఆయన, రంగస్థలానికి చేసిన సేవలకు గాను ఎస్‌ స్క్వేర్‌ మేనేజ్‌మెంట్‌ సత్యానంద్‌ను స్వర్ణకంకణంతో సన్మానించింది.
- వేంపాటి పరిమళ, విజయవాడ డెస్కు.
- ప్రజాశక్తి నుండి సేకరణ